قم، ایران – امام خمینی میموریل ٹرسٹ (IKMT) کرگل کی ذیلی شاخ، جو اسلامی جمہوریہ ایران کے مقدس شہر قم میں واقع ہے، نے حافظِ کل قرآن، حجۃ الاسلام شیخ ابراہیم خلیلی کے اعزاز میں ایک پروقار تقریب کا انعقاد کیا۔ اس موقع پر آئی کے ایم ٹی کے مسئولین اور مذہبی شخصیات نے انہیں مکمل قرآن کریم حفظ کرنے پر مبارکباد اور تہنیت پیش کی۔

تقریب سے خطاب کرتے ہوئے شیخ ابراہیم خلیلی نے حفظِ قرآن کی اہمیت پر روشنی ڈالتے ہوئے کہا کہ انہیں قرآن کریم حفظ کرنے کا شوق مشہد مقدس میں دورانِ تعلیم، حرمِ مطہر امام رضا علیہ السلام میں منعقدہ مسابقۂ حفظِ قرآن سے ہوا۔ بعدازاں، انہوں نے حفظِ قرآن کے خصوصی کورس میں شمولیت اختیار کی اور محض ایک سال میں مکمل قرآن کریم حفظ کر لیا۔

شیخ خلیلی نے مزید وضاحت کی کہ حفظِ قرآن کے تین خصوصی کورسز ہوتے ہیں، جن کی مدت بالترتیب ایک سال، تین سال، اور پانچ سال پر مشتمل ہوتی ہے۔ اگرچہ ایک سالہ کورس مکمل حفظِ قرآن کے لیے ہوتا ہے، تاہم اس کے بعد بھی تین سال تک تلاوتِ قرآن اور حفظ کو مستحکم کرنا ضروری ہوتا ہے۔ انہوں نے اس امر پر زور دیا کہ کم عمری میں قرآن کریم حفظ کرنا نسبتاً آسان ہوتا ہے اور والدین کو چاہیے کہ وہ بچوں کی اس سمت میں رہنمائی کریں۔

* Click to Follow Voice of Ladakh on WhatsApp *

اس پروقار تقریب میں آغا سید علی الموسوی، شیخ گلزار نظام الدین، شیخ مہدی فدائی، اور دیگر اہم شخصیات نے شرکت کی۔ یاد رہے کہ شیخ ابراہیم خلیلی کرگل کے پہلے مکمل حافظِ قرآن ہیں، جن کی اس کامیابی کو علمی و دینی حلقوں میں بے حد سراہا جا رہا ہے۔