کرگل: چیف ایگزیکٹیو کونسلر (سی ای سی) کرگل، ڈاکٹر جعفر آخوند، نے لیفٹیننٹ گورنر (ایل جی) لداخ، ڈاکٹر بی ڈی مشرا، کے اس فیصلے کا خیر مقدم کیا ہے جس کے تحت ڈائریکٹرز کو اپنی متعین شدہ جگہ پر رہ کر بایومیٹرک حاضری کو یقینی بنانا ہوگا۔ انہوں نے کہا کہ اس فیصلے سے سرکاری ملازمین کو اپنی ذمہ داریوں سے پہلو تہی برتنے کا موقع نہیں ملے گا اور وہ اپنی ڈیوٹی ایمانداری سے انجام دیں گے۔

تاہم، ڈاکٹر جعفر نے وضاحت کی کہ ڈائریکٹرز کو لداخ کے اندر دورے کرنے یا اجلاسوں میں شرکت سے منع نہیں کیا گیا ہے۔ البتہ انہیں اپنی ڈیوٹی ایمانداری سے انجام دینے کی سختی سے ہدایت دی گئی ہے، جو کہ ضروری ہے کیونکہ اکثر یہ دیکھا گیا ہے کہ بعض ڈائریکٹرز دوروں کے بہانے گھروں میں مقیم رہتے ہیں اور اپنی ذمہ داریوں کو مؤثر طریقے سے نبھانے سے قاصر رہتے ہیں۔

انہوں نے میٹنگز میں شرکت سے متعلق خدشات پر کہا کہ آج کے دور میں اجلاس آن لائن بھی منعقد کیے جا سکتے ہیں، لہٰذا یہ کوئی بڑا مسئلہ نہیں ہے۔ تاہم، ایل جی نے یہ نہیں کہا کہ ڈائریکٹرز اجلاس میں شرکت نہ کریں، بلکہ یو ٹی سطح کے افسران کو ہدایت دی گئی ہے کہ وہ سیکریٹریز سے اجازت لیں۔

ڈاکٹر جعفر نے الزام لگایا کہ کرگل میں تعینات بعض ڈائریکٹرز اپنی ذمہ داریوں سے پہلو تہی برت رہے ہیں اور سی ای سی لیہ کو غلط بریفنگ دے رہے ہیں تاکہ وہ کرگل میں ڈیوٹی انجام دینے کے بجائے گھروں میں آرام کر سکیں۔ انہوں نے واضح الفاظ میں کہا کہ ایسی سازشوں کو کامیاب نہیں ہونے دیا جائے گا۔

ساتھ ہی، انہوں نے اس بات پر زور دیا کہ یو ٹی کا ہیڈکوارٹر چھ چھ ماہ کے لیے باری باری لیہ اور کرگل میں ہونا چاہیے۔ انہوں نے کہا کہ ایل جی لداخ کے حالیہ دورۂ کرگل پر لیہ کے بعض عناصر کو اعتراض ہے، اور یہی عناصر لیہ اور کرگل کے ہل کونسلز کے درمیان دراڑ ڈالنے کی کوشش کر رہے ہیں۔

مزید برآں، سی ای سی کرگل نے ہل کونسلوں کو نظر انداز کرنے کے لیہ سی ای سی کے بیان سے اتفاق کرتے ہوئے، ہل کونسلز کو اعتماد میں لینے کی ضرورت پر زور دیا۔ اس دوران، انہوں نے ایل جی لداخ کو ایک ایماندار اور اصول پسند شخصیت قرار دیا۔