تنِ  تنہا   چہکتا   ہے کسی  خاموش بستی  میں

پرندہ ہے  جو  رہتا ہےکسی  خاموش بستی  میں

* Click to Follow Voice of Ladakh on WhatsApp *

کنارہ ہے وہ سورو کا جہاں اُس کا ٹھکانہ ہے

وہ اک دریا جو بہتا ہے کسی خاموش بستی میں

شبِ تاریک میں اٹھکر یہی اب کام ہے اُسکا

کلامِ  میر  پڑھتا  ہے کسی  خاموش  بستی  میں

وہ دوری  اہلِ خانہ سے جدائی اپنے  یاروں کی

الم کیا کیا وہ سہتا ہےکسی خاموش بستی میں

نگاہیں نم دلِ پُرغم کبھی جب ساتھ ملتے ہیں

سخن کا ساز بڑھتا ہے کسی خاموش بستی میں

نظر کس کی لگی    مالی  چمن   ویراں   ہوا   اپنا

کوئی بلبل یہ کہتا ہے کسی  خاموش بستی  میں

اُسے بچوں کی کلکاری سنائی جب بھی دیتی ہے

بہت  کمزور   پڑتا  ہے کسی  خاموش  بستی  میں

یہاں مایوس راتوں میں امیدوں کا   کوئی جگنوں

لبِ صحرا   چمکتا  ہے کسی  خاموش  بستی  میں

ہوائیں   تیز   چلتی   ہیں نشیمن   تھرتھراتا   ہے

بدن   اپنا   لرزتا   ہے کسی   خاموش  بستی   میں

یہ صحرا ہے بھلے  فاروق خوشبو  تو  فضا  میں ہے

گلِ  لالہ  مہکتا   ہے کسی   خاموش  بستی  میں